點解酒樽底會凹入去？
唔少人都以為，個凹槽係比你揸實個酒樽，但諗真啲，酒樽工廠又點會咁好人幫你諗埋點樣 Serve 酒丫。
其實喺工業革命之前，玻璃樽係需要有經驗嘅工匠，一個個咁吹出黎，之不過吹出黎啲玻璃樽嘅樽底，就一定係弧形，諗下都知，呢個形態嘅玻璃樽一定放唔到平面，所以當時佢地就用最簡單嘅方法去解決： 將樽底搓返入去。令到玻璃樽底同枱嘅接觸面係圈形，而唔係圓形，就係咁樣解決咗酒樽站立嘅問題。
後來科技越來越進步，製造玻璃樽已經唔使好似以前咁麻煩，但葡萄酒一向都係崇尚古法、文化、歷史嘅產物，所以就保留咗呢方面嘅傳統。
當然而家都有研究指出，樽底有凹槽有助耐高壓，更加適合氣泡酒、又或者凹槽方便處理老紅酒嘅沉澱物，不過呢一Part 我覺得只係倒果為因：先有凹槽，再諗佢有咩好處 。
而最後想講嘅係，凹槽嘅深淺，同酒嘅品質係。完。全。無。關。 千萬唔好同人講酒樽重，凹槽深，就係好酒
|
|
|
